gipuzkoakultura.eus

Logo de la Diputación Foral de Gipuzkoa
2024ko martxoak 29, ostirala

Fondoak

Fondoak

Batzarre eta Aldundiak 

Artxibo hau Gipuzkoako Lurralde Historikoaren erakunde diren Batzarre eta Aldundiek sortu edo jasotako agiriez dago osaturik; XV. mendetik XX. mendearen amaiera arteko agiriak hartzen ditu barne, eta zabalik dago erakunde horietatik datozen agiriak jasotzeko.

Gai eta mota askotako agiriak dira, erakunde horiek mendez mende izan dituzten zereginak eta jarraitasuna ere halakoxeak izan baitira: aktak, ordenantzen koadernoak, foru bildumak, aurrekontu eta kontuak, probintzi-arielak, kaparetasunen irizpenak eta baita espedienteak ere. Azken horiek ongintza, probintzia, nekazaritza eta basogintza-lanenak, soldadutzarako salbuespenenak eta zenbait eskola eta kultur erakunderi emandako laguntzen gaineko espedienteak dira.

Horrez gain, fondo horretan bertan dago Irungo pasabideko kontrabandoa zaintzeko ardura zuen erakundearen dokumentazioa, Esportazio-Alkatearena, alegia. Erakunde hori Probintziaren menpe zegoen 1475 urteaz geroztik, betiko saria zela medio.


On-line kontsulta: Aintzinako sekzioa


Korregimendua

Artxibo hau korregidoreak gobernu eta justizi zereginetan sortu edo jasotako agiriez dago osaturik. Jakina denez, korregidorea erregeren ordezkaria zen Gipuzkoan. Agiriak XVI. mendetik 1841. urtean korregimendua kendu artekoak dira. 

Gipuzkoako Artxibo Orokorrera (AGG-GAO) 1907an ekarri zituzten; aurrez, Foru Aldundiaren jauregian, Donostian, eta Azkoitiko zenbait lekutan egon ziren sakabanatuta.

Justizi zereginen inguruko agiriak korregidoreak lehen edo bigarren instantzian aztertutakoak dira: auzi zibilak, ondasunen exekuzioak, hartzekodunen konkurtsoak eta auzi kriminalak. Gobernu zereginei buruzko agiriak, berriz, korregidoreak Gipuzkoako udal ogasunen gain zeukan eginkizun fiskalizatzaileaz sortutako espedienteak dira: zentsura espedienteak, kontu likidazioak, etab.


On-line kontsulta: Auzi kriminalak, Auzi Zibilak (Uriaren eta Elortzaren eskribautzak) eta Auzi Exekutiboak (Uriaren eta Elortzaren eskribautzak)


Tolosako notari barrutiko protokoloak 

Gure artxiboan dira Tolosako notari barrutiko protokolo notarialak, hau da, izkribauek eta notarioek XVI. mendearen hasieratik baimendutako jatorrizko izkribuen bilduma ordenatuak. Ehun urte betetzen dituzten protokoloak jasotzen ditugu urtero fondo horretan.

Protokolo hauek AGG-GAOn gordetzen dira 1908az geroztik. Gainerako notari-barrutietakoak (Azpeitia, Bergara eta Donostia) Gipuzkoako Protokoloen Artxibo Historikoan (AHPG-GPAH) gordetzen dira, Oñatin, 1942an artxibo hori sortu zenez geroztik.


On-line kontsulta: protokolo guztiak eta aurkibideak


Bestelako artxibo eta bildumak

Aipatu ditugun fondo handi horiez gain, AGG-GAOk bestelako fondoak ere gorde eta zaintzen ditu, Gipuzkoako erakunde eta pertsona publiko nahiz pribatuen artxibo eta agiri bildumak, alegia:
 

  • . Karlista
  • . Fermin Lasala Collado, Mandaseko dukea On-line kontsulta
  • . Allende Salazar
  • . Zurbano Etxea (zati bat)
  • . Indalecio Ojanguren (argazkitegia) On-line kontsulta
  • . Juan San Martin (argazkitegia) On-line kontsulta
  • . Sigfrido Koch (argazkitegia) On-line kontsulta
  • . Xabi Otero (argazkitegia) On-line kontsulta
  • . Urumea–Ibaiaren Mendarteko Udaleen Elkartea
  • . Gaztañaduy Etxea (Ignacio Ganuza y Lardizabal jaunaren dohaintza)
  • . Querejazu Etxea (1998an erosita)
  • . Udaletako kaparetasun-agiriak
  • . Erositako agiriak
  • . Zubietako Baserri Jabe Kideen Elkartea (Komodato kontratua) Consulta on-line


Tresna deskribatzaileak

Oro har, Gipuzkoako Artxibo Orokorreko (AGG-GAO) fondo guztiek beren tresna deskribatzaileak dituzte; horien artean, ondorengo hauek daude argitaraturik:

–  MUNITA, Juan José: Índice de los documentos y papeles del Archivo General de la M.N. y M.L. Provincia de Guipúzcoa existente en la Iglesia Parroquial de la M.N.L. y V. Villa de Tolosa. San Sebastián, 1887.
Archivo del Antiguo Corregimiento de Guipúzcoa. 18--? (Ignacio José de Lecuonaren eskribautzako auziak bakarrik)
– AROCENA, Fausto: Los protocolos guipuzcoanos. San Sebastián, 1947. 

Gainera, gida gisa erabiltzen ditugu Jose Berruezoren Historia del Archivo General de Guipúzcoa (1953), eta 1530–1990: Batzarre eta Aldundietako Artxibategitik Gipuzkoako Artxibategi Orokorrera = 1530–1990: De Archivo de Juntas y Diputaciones a Archivo General de Gipuzkoa (1990), AGG-GAOko teknikoek egina.

Azken urte hauetan artxiboa zeharo murgilduta dago artxibozaintzako deskribapena normalizatzeko abian den nazioarteko prozesuan. Gaur egun, deskribapenak egokitzeko lana, ondoko arau hau betez egiten ari gara: ISAD(G): Norma Internacional General de Descripción Archivística, espainierazko behin betiko bertsioa, Hezkuntza, Kultura eta Kirol Ministerioak 2000. urtean argitaratua.

 

Licencia Creative Commons. Pulse aquí para leerla
2020 Kultura, Lankidetza, Gazteria eta Kirol Departamentua - Gipuzkoako Foru Aldundia
Logotipo Gipuzkoa.eus. Pulsar para ir a la página de Gipuzkoa.eus